Déi ganz Schoulfoire iwwer – mee besonnesch dëse Sonndeg, den 19. Abrëll – ginn et nieft de sëllegen Ateliere ganz vill Highlights an der Luxexpo.

D’Laura Thorn op der grousser Bün erliewen, Showcooking mam Clovis Degrave vun der “Grünewald Chef’s Table” oder mam Ben Weber “La Bottega Gudde Kascht ”, Workshoppe mat Kënschtler wéi dem Alain Welter, dem Lisa Junius oder mam Kamellebuttek, e Planetarium besichen, mat Drone Fussball spillen an Ardenner-Päerd bei der Aarbecht nokucken: Déi ganz Schoulfoire iwwer – mee besonnesch dëse Sonndeg, den 19. Abrëll – ginn et nieft de sëllegen Ateliere ganz vill Highlights an der Luxexpo. Am Programm si si duerch dëst Symbol markéiert.

D’Schoulfoire ass ganz gutt mam ëffentlechen Transport erreechbar.

D’Schoulfoire ass ganz gutt mam ëffentlechen Transport erreechbar: den Tram hält net wäit vun der Entrée an och eng Busgare ass ganz no dobäi. D’Horaire fannt Dir hei. Wee mam Auto wëll kommen, fënnt um Areal vun der Luxexpo Parkplazen a limitéierter Zuel géint Bezuelung.

Da kommt an déi temporär Cafeteria Food4Brain an der Hal 8 oder bei ee vun den zwee Foodtrucks, déi op der Plaz sinn.

Da kommt an déi temporär Cafeteria Food4Brain an der Hal 8 oder bei ee vun den zwee Foodtrucks, déi op der Plaz sinn. D’Ekipp vu Restopolis bitt Iech do eng Auswiel un hausgemaachte salzegen a séisse Snacks un, esou wéi waarm a kaalt Gedrénks. D’Cafeteria ass op sonndes, den 19. Abrëll, vun 11:00 bis 18:00 Auer, méindes, den 20. Abrëll, vun 8:00 bis 15:00 Auer, dënschdes, den 21. Abrëll, vun 8:00 bis 17:00 Auer a mëttwochs, den 22. Abrëll, vun 8:00 bis 15:00 Auer op.

Hei sinn d’Ouvertureszäite vun de Foodtrucks: sonndes, den 19. Abrëll, vun 11:00 bis 17:00 Auer; méindes, den 20. Abrëll, vun 11:00 bis 15:00 Auer; dënschdes, den 21. Abrëll, vun 11:00 bis 17:00 Auer; mëttwochs, den 22. Abrëll, vun 11:00 bis 15:00 Auer.

Dir kënnt mat Bankkaart, boer oder mat der myCard bezuelen.

Am Kader vum Engagement vu Restopolis géint d’Liewensmëttelverschwendung ginn déi net verkaafte Produite gratis am Kader vun der Initiativ AntiGaspi2Go weiderverdeelt.

Näischt méi dran an denger Drénkwaasserfläsch? Da fëll se an e puer Minutten op.

An allen Hale vun der Schoulfoire gëtt et eng Drénkwaasserstatioun. Si ass mat engem Fändel markéiert a ka gratis benotzt ginn.

An all Hal ginn et Poubellen.

Trenn wgl. däin Offall a kuck op de Poubellen, wat wou dra kënnt. Hëllef mat, d’Schoulfoire propper ze halen an e Maximum ze recycléieren !

Op der Schoulfoire kritt Dir d’Geleeënheet, Är Froen direkt un d’Lycéeën ze stellen.

Si sinn all am Lycée Village an der Hal 8 regruppéiert. D’Regioune vum Land, an deenen d’Lycéeë schaffen, si mat verschidde Faarwe markéiert, sou dass Dir direkt de Lycée fannt, deen Iech interesséiert. Dir wëllt méi iwwer den Opbau vum Lycée Village wëssen an Iech scho mol iwwer déi verschidde Lycéeën dokumentéieren? Da luet den interaktive Plang vum Lycée Village erof. E Klick op déi verschidde Casë féiert Iech op d’Websäit vum jeeweilege Lycée. Am Lycée Village kënnt Dir Iech och um Infopoint guidéiere loossen.

All Äntwerten zur Beruffsausbildung ginn et um Shape Your Future-Stand am Entrées-Beräich.

D’berufflech Éischtausbildung zu Lëtzebuerg, dat sinn 130 diploméierend Formatiounen, dräi Zertifizéierungsniveauen – CCP, DAP, DT –, dräi Unterrechtssproochen an ongeféier 6.500 Schüler. Wien? Wat? Wéi? Wou? Wéini? Um Stand vun der Promotiounscampagne Shape Your Future, deen am Entrées-Beräich läit, kënnt Dir all Är Froe un d’Mataarbechter vum Ministère an un d’Vertrieder vun de Beruffskummere stellen: Chambre d’agriculture, Chambre de commerce, Chambre des métiers et Chambre des salariés.

Och dëst Joer bitt d‘Schoulfoire eng Hellewull un Aktivitéiten.

D’Schoulfoire ass interaktiv ! Hei kanns du dech net nëmmen informéieren a berode loosse fir deng schoulesch a berufflech Karriär: Hei kanns du matmaachen, upaken, schmaachen, selwer probéieren, deng Talenter asetzen an entdecken, wéi e Beruff dir läit! Ronn 200 Atelieren, Showen a Kompetitioune stinn iwwer déi véier Deeg vun der Schoulfoire um Programm. Wat wéini ugebuede gëtt, kanns du direkt an dëser Lëscht kucken. Du kanns dir awer och den interaktive Plang vun der Schoulfoire ukucken. Wann s du op déi verschidden Elementer klickt, gesäis du de Programm op deene verschidde Plazen.

Sonndes, den 19. Abrëll an dënschdesmëttes, den 21. Abrëll ass op fir de Grand Public.

Hei sinn d’Ëffnungszäiten am Detail:

• Sonndeg, 19. Abrëll vun 11:00 bis 18:00 Auer: Op fir de Grand Public.
• Méindeg, 20. Abrëll vun 8:30 bis 15:00 Auer: Reservéiert fir Schoulklassen.
• Dënschdeg, 21. Abrëll vun 8:30 bis 17:00 Auer.
  Moies: Reservéiert fir Schoulklassen vun 8:30 bis 13:00 Auer. Léierplazendag vun 8:30 bis 14:00.
  Nomëttes: Op fir de Grand Public vun 13:00 Auer bis 17:00 Auer & op fir d’SEAS (Maisons relais, Dagesfoyeren a Schoulfoyeren) an Dageselteren (Cyclen 3.2-4.2) vun 13:00 bis 17:00 Auer.
• Mëttwoch, den 22. Abrëll vun 8:30 bis 15:00 Auer: Reservéiert fir Schoulklassen.